Мьянма мен Таиландта жойқын жер сілкіністері болды
Оңтүстік-Шығыс Азияда бірнеше жойқын жер сілкінісі тіркелді. Ең күшті дүмпулер Мьянмадағы Мандалай қаласында байқалды — магнитудасы 7,7 балға дейін жетіп, артынша 6,4 балдық екінші жер сілкінісі болды.
Жергілікті биліктің мәліметінше, Мьянма мен Таиландта ғимараттар мен көпірлер қираған, байланыс желілері үзілген, ондаған адам хабар-ошарсыз кеткен.
Таиланд астанасы Бангкокта да қатты дүмпулер сезілген. Алдын ала ақпарат бойынша, құлаған ғимараттың астында кемінде 43 құрылысшы қалған.
Таиланд премьер-министрі Бангкокта төтенше жағдай режимін жариялады. Құтқару жұмыстары тәулік бойы жүргізілуде, әскер мен медицина қызметкерлері жұмылдырылған.
Қаза тапқандар туралы ресми ақпарат әлі нақтыланбағанымен, қираудың ауқымы адам өлімі болуы мүмкін екенін көрсетеді.
Аймақта кейінгі дүмпулер болуы мүмкін деген қауіп бар. Құтқару жұмыстарына инфрақұрылымның зақымдануы мен электр энергиясының үзілуі кедергі келтіруде. Билік тұрғындарды қауіпсіздік шараларын сақтауға және баспаналарда қалуға шақыруда.
Редакция басқа көздерден алынған, жіберілген немесе алынған материалдардың мазмұны мен дұрыстығына жауапты емес. Мұндай материалдарды жариялау тек ақпараттық мақсаттарға арналған және олардың мазмұнын автоматты түрде растауды немесе мақұлдауды білдірмейді.