Трамп жарлыққа қол қойды: ағылшын тілі АҚШ-тың ресми тіліне айналды
АҚШ Президенті Дональд Трамп ел аумағында ағылшын тілін ресми тіл ретінде бекітетін тарихи жарлыққа қол қойды. Бұған дейін АҚШ-та федералдық деңгейде ресми тіл болған жоқ, тек 32 штат заң жүзінде ағылшын тілін негізгі тіл ретінде қабылдаған.
Өз мәлімдемесінде Трамп "АҚШ-та ағылшын тілін ресми тіл ретінде тану қажеттігі баяғыда пісіп-жетілді" деп атап өтіп, ортақ тіл ұлттық бірлікті нығайтатынын ерекше айтты.
Бұл шешім қоғамда үлкен пікірталас тудырды, өйткені АҚШ әлемдегі ең көптілді елдердің бірі болып табылады. Елде 350-ден астам тілде сөйлейді, ал 68 миллион адам үйінде ағылшын тілінен басқа тілдерді пайдаланады, олардың 40 миллионынан астамы испан тілінде сөйлейді.
Жаңа ереже сонымен қатар Билл Клинтонның 2000 жылғы жарлығын жояды, ол федералдық агенттіктерді қызметтерді бірнеше тілде көрсетуге міндеттеген болатын. Енді әрбір мекеме аударма қажет пе, жоқ па – өз бетінше шешеді.
Трамп ұлттық бірегейлікті қорғаудың маңыздылығын бірнеше рет атап өткен және бақылаусыз иммиграцияны АҚШ-қа төнген қауіп ретінде сипаттаған. 2024 жылғы республикашылар съезінде, ол "Елге мамандар да түсінбейтін тілдер енуде" деп мәлімдеген еді.
Сонымен қатар, жаңа жарлық АҚШ-тың ең биік тауы – Маккинли атауын қайтарып, Барак Обаманың оны жергілікті халықтардың тіліндегі "Денали" атауына өзгерту туралы шешімін жоққа шығарады.
Бұл жаңа шаралар Трамп әкімшілігінің ұлттық бірегейлікті нығайтуға, иммиграцияны қатаң бақылауға және мемлекеттік құрылымдарды реформалауға бағытталған жалпы саясатының бір бөлігі болып табылады.
Редакция басқа көздерден алынған, жіберілген немесе алынған материалдардың мазмұны мен дұрыстығына жауапты емес. Мұндай материалдарды жариялау тек ақпараттық мақсаттарға арналған және олардың мазмұнын автоматты түрде растауды немесе мақұлдауды білдірмейді.