Миллиардтаған теңге: Қазақстанда кімдер шетелден қаржы алған
Қазақстанның Мемлекеттік кірістер комитеті 2023–2024 жылдары шетелдік қаржыландыру алған ұйымдар мен тұлғалардың кеңейтілген тізімін жариялады. Ведомство дерегінше, жалпы қаржы көлемі 55 млрд теңгеден асқан. Қаржыландыру алғандар қатарында 295 адам мен ондаған заңды ұйым бар.
Тізімге енгендер қатарында заңгерлік фирмалар, халықаралық корпорациялар, фармацевтикалық компаниялар, консалтинг агенттіктері, БАҚ, құқық қорғау және білім беру қорлары, сондай-ақ қоғамдық бірлестіктер бар.
Негізгі алушылар санаттары:
Заңгерлік және қаржылық құрылымдар: Unicase, Baker & McKenzie, Deloitte, PwC, JP Morgan Chase, GRATA, Signum, Saýat Жолши және басқалар;
Фармацевтикалық компаниялар: Sun Pharmaceutical, Dr. Reddy’s, Boston Scientific, Adamad Pharma, Getz Pharma, Gedeon Richter, Ferring Pharmaceuticals, Medochemie және т.б.;
Медиа және құқық қорғау ұйымдары: Internews, MediaNet, Freedom House, «Әділ сөз», Қазақстан халықаралық адам құқықтары бюросы, FemAgora, PaperLab, Urban Forum, ZubR, «Крылья свободы»;
Қоғамдық бірлестіктер мен қорлар: «Сана сезім», Phoenix, «Ар.Рух.Хак.», «Шырак», «Равный – равному плюс», «Қайсар», «Шекарасыз өзендер», «MAD Consulting», «Мейерім», CAPS Unlock және т.б.;
Білім беру және мәдени орталықтар: Американдық білім беру кеңестері, Eurasia Foundation, Фридрих Эберт қоры, Роза Люксембург қоры, Cultural Dialogue және басқалар.
Тізімде Mitsubishi, Intel, Grohe, Michelin, UBS, BSH, Lufthansa Consulting, Komatsu, Nippon Express сияқты танымал халықаралық брендтер мен өнеркәсіптік корпорациялардың өкілдіктері, сондай-ақ салалық бірлестіктер мен ҮЕҰ да бар.
Жылдар бойынша қаржыландыру көлемі:
-
2023 жыл — 28,7 млрд теңге (267 алушы)
-
2024 жыл — 27,2 млрд теңге (218 алушы)
Жариялаудың мақсаты мен билік жауабы
МКК бұл ақпаратты жариялау ашықтық пен қоғам сенімін арттыру мақсатында жүзеге асырылып отырғанын мәлімдеді.
Бұған дейін Президент Қасым-Жомарт Тоқаев Құрылтайда шетелдік құрылымдар жылдар бойы ішкі саясатқа ықпал етіп келгенін, қаржылық тетіктер мен миллиардтаған бюджеттер арқылы әрекет етіп отырғанын айтып, бақылауды күшейту қажеттігін атап өткен.
Жарияланған тізімде ұйым атаулары көрсетілгенімен, қаражаттың сипаты мен мақсаты туралы ақпарат берілмеген. Дегенмен бұл тізім сарапшылар мен қоғам арасында белсенді пікірталас тудырды.
Қазақстан билігі мұндай тәжірибе ашықтықты арттыру және ішкі үдерістерге сыртқы ықпалдарды бақылау стратегиясының тұрақты құралына айналатынын мәлімдеуде.
Редакция басқа көздерден алынған, жіберілген немесе алынған материалдардың мазмұны мен дұрыстығына жауапты емес. Мұндай материалдарды жариялау тек ақпараттық мақсаттарға арналған және олардың мазмұнын автоматты түрде растауды немесе мақұлдауды білдірмейді.